।। नागराजविरचितं काश्मीरवैभवम् ।।

 

श्रीचक्रोपरिसंस्थितां सुरनुतां श्रीराजराजेश्वरीं

श्रीविद्याजननीं शिवां त्रिनयनां कारुण्यवारांनिधिम् ।

श्रीकाश्मीरपुराधिवासनिरतां श्रीकण्ठचेतोहरां

श्रीवाणीपरिसेवितां पुरहरां वन्दे महादेवताम् ।। 1 ।।

सुमंगलाभालविभूषणांका विभाति रेखेव सुकुंकुमस्य  ।

काश्मीरभूः कुंकुमजन्मभूमिर्दिश्युत्तरस्यां भारताख्यखण्डे ।। 2 ।।

अनादिकालादपि कश्यपस्य कृपेव या भाति हिमालयाग्रे ।

गीर्वाणवाणीकवितामयी सा काश्मीरभूमिर्जयति प्रशस्ता ।। 3 ।।

यत्र द्राक्षा मधुरमधुरं दिव्यधारां प्रसूते

नेत्रानन्दं विदधति तथा कुंकुमं केसराश्च ।।

शैवाद्वैतं हृदयसुखमाप्यातनोति प्रभूतं

काश्मीरास्ते भरतवसुधाभूषणानीव भान्ति ।। 4 ।।

यत्र स्त्रीणां लसति मधुरा चारुगीर्वाणवाणी

वाणी साक्षान्निवसति मनोहारिणी सर्वशक्तिः ।

शक्तेस्तत्त्वं भुवनविदितं द्योतते नव्यभासा-

भासाख्यो वा जयति जनताचिद्विकासोऽभिवादः ।।5 ।।

द्राक्षाकुंकुमकेसरैर्विलसिता विद्वदजनप्रेयसी

शैवाद्वैतसुधाभिवृष्टिविकसद् ज्ञानांकुरोल्लासिनी ।

वाणीपीठविजृम्भिता जनमनश्शान्तिप्रदा निर्मला

काश्मीराख्यमहामही विजयते सौन्दर्यशोभान्विता ।। 6 ।।

मुनिरभिनवगुप्तो बिल्हणः कल्हणश्च

ध्वनिरसगुणतो ये काव्भेदान्वितेनुः ।

सरसकविवरेण्यः क्षेमपूर्वेन्द्रनामा

धवलतमयशस्काः सन्ति काश्मीरकास्ते ।। 7 ।।

निखिलकविसमूहो रम्यकाश्मीरजातः

रुचिरतमवचोभिः संस्कृतैः काव्यवृद्धिम् ।

अभिनवतररीत्या संविधाय प्रशस्तिं

निरुपमनिरवद्यां प्राप्तवान्पूर्णमत्र ।। 8 ।।

रसभरितफलानां जन्मभूमिः प्रभूतं

रससहितकृतीनां सृष्टिकर्त्री शतानाम् ।

रसिकजनसुखानां मूलहेतुर्बहूनां

सरससरसिजातानां भाति काश्मीरभूमिः ।। 9 ।।

काश्मीरजातकवितारसबिन्दुसिक्तं

गीर्वाणवाङ्मयमतीवं चमत्कृतं हि ।

बुद्धेर्विकासममलं सुखमात्मनश्च

केषां ददाति न वरं सकृदप्यधीतम् ।। 10 ।।

न भारतसमः खण्डो न संस्कृतसमं वचः ।

न काश्मीरसमो देशो न तत्काव्यसमं भुविः ।। 11 ।।

यत्कारुण्यलवैनैव जगदुन्मीलति क्षणात् ।

तां वन्दे शारदां देवीं काश्मीरपुरवासिनीम् ।। 12 ।।